𐌲𐌿𐌸

𐌲𐌿𐌸 (𐌲𐌸) 𐌹𐌽 𐌰𐌹𐌽𐌰𐌲𐌿𐌳𐌰𐌷𐌰𐌹𐌼 𐍄𐍂𐌰𐌿𐌰𐌹𐌽𐌹𐌷𐍂𐌰𐌼𐍉𐌼 𐌸𐍂𐍉𐌸𐌹𐌻𐌴𐌹𐌺𐍉 𐌰𐍄𐍅𐌹𐍄𐌰𐌹𐌳 𐌹𐍃𐍄 𐍃𐍅𐌴 𐌰𐌿𐌷𐌿𐌼𐌹𐍃𐍄 𐌾𐌰𐌷 𐌲𐌰𐍃𐌺𐌰𐍀𐌾𐌰 𐌾𐌰𐌷 𐌷𐌰𐌿𐌱𐌹𐌳𐌰𐌿𐍆𐍅𐌰𐍂𐍀 𐍄𐍂𐌰𐌿𐌰𐌹𐌽𐌰𐌹𐍃. 𐌹𐌽𐌿𐌷 𐌼𐌰𐌽𐌰𐌲𐌰𐌲𐌿𐌳𐌰𐌷𐌰𐌹𐌼 𐍄𐍂𐌰𐌿𐌰𐌹𐌽𐌹𐌷𐍂𐌰𐌼𐍉𐌼 𐌲𐌿𐌸 𐌹𐍃𐍄 𐌰𐌷𐌼𐌰 𐌰𐌹𐌸𐌸𐌰𐌿 𐌲𐌰𐍃𐌺𐌰𐍆𐍄𐍃 𐌲𐌰𐌻𐌰𐌿𐌱𐌹𐌳𐌰 𐌳𐌿 𐌲𐌰𐍃𐌺𐌰𐍀𐌾𐌰𐌽 𐌸𐌰𐌽𐌰 𐍆𐌰𐌹𐍂𐍈𐌿 𐌰𐌹𐌸𐌸𐌰𐌿 𐌻𐌹𐌱𐌰𐌹𐌽, 𐌳𐌿𐌸𐌸𐌴 𐌰𐌽𐍃𐌿𐍃 𐍃𐍅𐌰𐌻𐌴𐌹𐌺𐍃 𐌿𐍆𐍄𐌰 𐌹𐌽𐍅𐌴𐌹𐍄𐌰𐌳𐌰. 𐍄𐍂𐌰𐌿𐌰𐌹𐌽𐍃 𐌹𐌽 𐍅𐌹𐍃𐍄 𐌰𐌹𐌽𐌹𐍃 𐌳𐌿 𐌼𐌹𐌽𐌽𐌹𐍃𐍄𐌰𐌼𐌼𐌰 𐌲𐌿𐌳𐌹𐍃 𐌲𐌿𐌳𐌰𐌼𐌹𐍄𐍉𐌽𐍃 𐌷𐌰𐌹𐍄𐌰𐌳𐌰.

𐌹𐌽𐍃𐌰𐌷𐍄𐌴𐌹𐍃 𐌱𐌹 𐌲𐌿𐌸 𐌼𐌰𐌽𐌰𐌲𐍆𐌰𐌻𐌸𐍉𐍃 𐍃𐌹𐌽𐌳. 𐌼𐌰𐌽𐌰𐌲𐌰𐌹 𐌲𐌿𐌳𐌰𐌻𐌴𐌹𐍃𐌾𐌰𐌽𐍃 𐌾𐌰𐌷 𐍆𐍂𐍉𐌳𐌰𐌻𐌿𐌱𐌾𐌰𐌽𐍃 𐍂𐌰𐌺𐍉𐍃 𐍆𐌰𐌿𐍂 𐌾𐌰𐌷 𐍅𐌹𐌸𐍂𐌰 𐌲𐌿𐌳𐌹𐍃 𐍅𐌹𐍃𐍄 𐌲𐌰𐍅𐌰𐌿𐍂𐌺𐌹𐌳𐌴𐌳𐌿𐌽. 𐍃𐌰𐌺𐌹𐌸𐌿𐌷 𐌿𐌽𐌲𐌿𐌳𐌰𐌼𐌹𐍄𐍉𐌽𐍃 𐍄𐍂𐌰𐌿𐌰𐌹𐌽 𐌰𐌽𐍃𐌰𐌿𐍃. 𐌹𐍃𐍄𐌿𐌷 𐌿𐌽𐌺𐌿𐌽𐌸𐌾𐌰𐌼𐌹𐍄𐍉𐌽𐍃 𐍄𐍂𐌰𐌿𐌰𐌹𐌽𐍃 𐌸𐌰𐍄𐌴𐌹 𐌲𐌿𐌳𐌹𐍃 𐍅𐌹𐍃𐍄𐍃 𐌿𐌽𐌺𐌿𐌽𐌸𐌰 𐌰𐌹𐌸𐌸𐌰𐌿 𐌿𐌽𐌺𐌿𐌽𐌸𐌰𐌱𐌴𐍂𐍃 𐍃𐌹𐌾𐌰𐌹. 𐍃𐌿𐌼𐌰𐌹𐌷 𐌲𐌿𐌳𐌰𐌼𐌹𐍄𐍉𐌽𐌾𐌰𐌽𐍃 𐌺𐌿𐌽𐌸𐌹 𐌱𐌹 𐌲𐌿𐌸 𐌰𐍄𐍃𐌰𐌹𐍈𐌰𐌽𐌳 𐍃𐍅𐌴 𐌰𐍆𐍂𐌰𐌽𐌽𐌹𐌸 𐍆𐍂𐌰𐌼 𐍄𐍂𐌰𐌿𐌰𐌹𐌽𐌰𐌹. 𐌲𐌿𐌸 𐌿𐍆𐍄𐌰 𐌲𐌰𐌺𐌿𐌽𐌽𐌰𐌳𐌰 𐍃𐍅𐌴 𐌰𐌷𐌿𐌼𐌹𐍃𐍄𐍉 𐍅𐌰𐌹𐌷𐍄𐍃 𐌹𐌽 𐌸𐌰𐌼𐌼𐌰 𐍆𐌰𐌹𐍂𐍈𐌰𐌿, 𐌹𐍃𐍄𐌿𐌷 𐍆𐍂𐌰𐌼 𐌼𐌰𐌽𐌰𐌲𐌰𐌹𐌼 𐌲𐌰𐌻𐌰𐌿𐌱𐌹𐌸 𐌸𐌰𐍄𐌴𐌹 𐌲𐌿𐌸 𐍃𐌹𐌾𐌰𐌹 𐌲𐍂𐌿𐌽𐌳𐌿𐍃 𐌰𐌻𐌻𐌰𐌹𐌶𐌴 𐌸𐌹𐌶𐌴 𐌹𐌽 𐌸𐌰𐌼𐌼𐌰 𐍆𐌰𐌹𐍂𐍈𐌰𐌿, 𐌲𐌰𐌷𐍃𐌰𐌹𐍈𐌰𐌳𐌰 𐍃𐍅𐌰𐍃𐍅𐌴 𐍃𐌰 𐌲𐌰𐍃𐌺𐌰𐍀𐌾𐌰 𐌾𐌰𐌷 𐌱𐌰𐌹𐍂𐌲𐌾𐌰𐌽𐌳𐍃 𐌾𐌰𐌷 𐍅𐌰𐌻𐌳𐌰𐌽𐌳𐍃 𐌸𐌹𐍃 𐍆𐌰𐌹𐍂𐍈𐌰𐌿𐍃. 𐌲𐌿𐌳𐌰 𐌿𐍆𐍄𐌰 𐌸𐌰𐌲𐌺𐌾𐌰𐌳𐌰 𐍃𐍅𐌰𐍃𐍅𐌴 𐌻𐌴𐌹𐌺𐌰𐌻𐌰𐌿𐍃 𐌾𐌰𐌷 𐌲𐌰𐍃𐌺𐌰𐍆𐍄𐌰𐌹𐍃 𐌿𐌽𐌱𐌿𐌽𐌳𐌰𐌽𐍃, 𐌼𐌹𐌸𐌸𐌰𐌽𐌴𐌹 𐌰𐌻𐌰𐌲𐌿𐌳𐌰𐌼𐌹𐍄𐍉𐌽𐍃 𐌰𐌷𐌾𐌹𐌸 𐌸𐌰𐍄𐌴𐌹 𐌲𐌿𐌸 𐍃𐌰 𐍆𐌰𐌹𐍂𐍈𐌿𐍃 𐍃𐌹𐌻𐌱𐌰 𐍃𐌹𐌾𐌰𐌹. 𐍈𐌴𐌹𐌻𐍉𐌼 𐌲𐌿𐌸 𐌲𐌰𐍃𐌰𐌹𐌷𐍈𐌰𐌳𐌰 𐍃𐍅𐌴 𐌰𐌻𐌰𐌱𐌻𐌴𐌹𐌳𐌴𐌹𐌽 𐌷𐌰𐌱𐌰𐌽𐌳𐍉, 𐌹𐌸 𐌲𐌿𐌳𐌰𐌼𐌹𐍄𐍉𐌽𐍃 𐍃𐌰𐌺𐌹𐌸 𐌸𐌰𐍄𐌴𐌹 𐌲𐌿𐌸 𐌽𐌹 𐌳𐌿𐌲𐌰𐍅𐌹𐌽𐌳𐌰𐌹 𐌸𐌹𐌶𐌰𐌹 𐌼𐌰𐌽𐌰𐍃𐌴𐌳𐌰𐌹 𐌰𐌻𐌾𐌰 𐌲𐌰𐍃𐌺𐌰𐍆𐍄𐌰𐌹.

𐍃𐌿𐌼𐌰 𐌰𐌽𐌰𐍆𐌹𐌻𐌷𐌰 𐌲𐌰𐌷𐌰𐍆𐍄𐌾𐌰𐌽𐌳 𐍄𐍂𐌰𐌿𐌰𐌹𐌽𐌰𐌹𐍃 𐍅𐌿𐌻𐌸𐍂 𐍆𐌰𐍃𐍄𐌿𐌱𐌽𐌾𐌰 𐍃𐌹𐌱𐌾𐍉𐍃 𐌲𐌿𐌳𐌰, 𐌿𐍆𐍄𐌰 𐌼𐌹𐌸 𐌱𐌻𐍉𐍄𐌹𐌽𐌰𐍃𐍃𐌰𐌿 𐌾𐌰𐌷 𐌱𐌹𐌳𐍉𐌼, 𐌲𐌰𐍃𐌰𐌹𐍈𐌰𐌽𐌳𐍉𐌽𐌰 𐌲𐌿𐌸 𐍃𐍅𐌴 𐌱𐍂𐌿𐌽𐌽𐌰𐌽 𐍃𐌺𐌿𐌻𐌳𐌰𐌹𐍃 𐌸𐌹𐌶𐍉𐍃 𐌹𐌽 𐌳𐌰𐌹𐌻𐌰𐌹. 𐌹𐍃𐍄𐌿𐌷 𐌲𐌿𐌳𐌰 𐌿𐍆𐍄𐌰 𐌼𐌴𐌻𐌾𐌰𐌳𐌰 𐌸𐌰𐍄𐌴𐌹 𐌽𐌹 𐍃𐌹𐌾𐌰𐌹 𐌺𐌿𐌽𐌹 𐌲𐌿𐌳𐌰, 𐌹𐌸 𐌰𐌻𐌾𐌰𐌹 𐍅𐌰𐌿𐍂𐌳𐌰𐌼 𐌱𐍂𐌿𐌺𐌾𐌰𐌽𐌳 𐌸𐍉𐌴𐌹 𐌱𐌰𐌽𐌳𐍅𐌾𐌰𐌽𐌳 𐌺𐌿𐌽𐌹. 𐌹𐍃𐍄𐌿𐌷 𐌲𐌿𐌸 𐌱𐌹 𐌽𐌰𐌼𐌽𐌰𐌼 𐌼𐌹𐍃𐍃𐌰𐌻𐌴𐌹𐌺𐌰𐌹𐌼 𐌷𐌰𐌹𐍄𐌰𐌳𐌰 𐌰𐍆𐌷𐌰𐌷𐌰𐌽𐌳𐌹𐌼 𐍂𐌰𐌶𐌳𐌰𐌹 𐌾𐌰𐌷 𐌰𐌽𐌰𐍆𐌹𐌻𐌷𐌰 𐌺𐌿𐌽𐌾𐌰𐌷𐌰𐌹𐌳𐌰𐌿𐍃, 𐍈𐌴𐌹𐌻𐍉𐌼 𐌼𐌹𐌸 𐌽𐌰𐌼𐌽𐌰𐌼 𐌼𐌹𐍃𐍃𐌰𐌻𐌴𐌹𐌺𐌰𐌹𐌼 𐌱𐍂𐌿𐌷𐍄𐌰𐌹𐌼 𐌳𐌿 𐌲𐌰𐍄𐌴𐌹𐌷𐌰𐌽 𐌼𐌰𐌽𐌰𐌲𐍉𐍃 𐌲𐌿𐌳𐌹𐍃 𐌼𐌰𐌷𐍄𐌹𐌽𐍃.

𐍅𐌰𐌿𐍂𐌳𐌰𐍆𐍂𐌿𐌼𐌹 𐌾𐌰𐌷 𐌽𐌿𐍄

𐍆𐍂𐌿𐌼𐌹𐍃𐍄𐍉 𐌽𐌿𐍄 𐍅𐌰𐌿𐍂𐌳𐌹𐍃 «𐌲𐌿𐌸» 𐌹𐌽 𐌲𐌿𐍄𐍂𐌰𐌶𐌳𐌰𐌹 𐌲𐌰𐍃𐌰𐌹𐍈𐌰𐌳𐌰, 𐍅𐌹𐍃𐌰𐌽𐌳𐌴𐌹𐌽 𐌰𐌹𐍂𐌹𐍃 𐌰𐌻𐌾𐌰𐌹𐌼 𐌲𐌰𐌹𐍂𐌼𐌰𐌽𐌹𐍃𐌺𐌰𐌹𐌼 𐍂𐌰𐌶𐌳𐍉𐌼. 𐌷𐌹𐍅𐌹 𐌹𐌳𐍄𐌹𐌼𐍂𐌹𐌳𐌹𐍃 𐍅𐌰𐌿𐍂𐌳𐌹𐍃 𐌸𐌹𐍃 𐌹𐌽 𐍆𐍂𐌿𐌼𐌰𐌹𐌽𐌳𐍉𐌰𐌹𐍅𐍂𐍉𐍀𐍂𐌰𐌶𐌳𐌰𐌹 *ǵhu-tó-m 𐍅𐌴𐍂𐌸𐌿𐌷𐍄𐍉 𐌰𐍆 𐍅𐌰𐌿𐍂𐍄𐌰𐌹 *ǵhau(ə)- 𐌸𐌹𐌿𐌳𐌾𐌰𐌽𐌳𐌴𐌹𐌽 𐌰𐌽𐌳𐌹𐌶𐌿𐌷 «𐌷𐌰𐌹𐍄𐌰𐌽» 𐌰𐌹𐌸𐌸𐌰𐌿 «𐌰𐍄𐌷𐌰𐌹𐍄𐌰𐌽». 𐌽𐌰𐌼𐌽𐌰 𐌲𐌿𐌳𐌹𐍃 𐌲𐌰𐌹𐍂𐌼𐌰𐌽𐌹𐍃𐌺𐌰 𐌹𐌽 𐍆𐍂𐌿𐌼𐌰 𐌽𐌹𐌰𐌽𐌳𐌹𐌶𐌿𐌷𐌺𐌿𐌽 𐍅𐌴𐍃𐌿𐌽, 𐌰𐌺𐌴𐌹 𐌰𐍄 𐌸𐌰𐌽 𐌲𐌰𐍅𐌰𐌽𐌳𐌾𐌰𐌽𐌳𐌴𐌹𐌼 𐌳𐌿 𐍇𐍂𐌹𐍃𐍄𐌰𐌿 𐌸𐌹𐌿𐌳𐍉𐌼 𐌸𐌰𐌹𐌼 𐌲𐌰𐌹𐍂𐌼𐌰𐌽𐌹𐍃𐌺𐍉𐌼 𐍅𐌰𐌿𐍂𐌳 𐌸𐌰𐍄𐌰 𐍆𐍂𐌰𐌼 𐌷𐌰𐌹𐌸𐌹𐌽𐌰𐍃𐍃𐌰𐌿 𐌹𐌽𐌽𐌰𐌺𐌿𐌽𐌳𐌰𐌼𐌼𐌰 𐌹𐌽 𐍃𐌺𐌰𐍀𐌰 𐌲𐌿𐌼𐌰𐌺𐌿𐌽𐌳 𐍅𐌰𐍂𐌸. 𐌹𐌽𐌿𐌷 𐌰𐌲𐌲𐌹𐌻𐍂𐌰𐌶𐌳𐌰𐌹 𐌲𐌰𐌼𐌹𐌺𐌹𐌻𐌱𐍉𐌺𐌰𐍃𐍄𐌰𐌱𐌴𐌹𐌽𐍃 𐌱𐍂𐌿𐌺𐌾𐌰𐌳𐌰 𐌸𐌰𐌼𐌼𐌰 𐍅𐌰𐌿𐍂𐌳𐌰 𐍃𐍅𐌴 𐍆𐌰𐌲𐌾𐌰𐍄𐌰 𐌽𐌰𐌼𐍉 𐌾𐌰𐌷 𐌹𐌽 𐌰𐌻𐌾𐌰𐌹𐌼 𐌽𐌰𐌼𐌽𐌰𐌼 𐌲𐌰𐌺𐌿𐌽𐌸𐌰𐌹𐌼 𐌲𐌿𐌳𐌹𐍃. 𐌳𐌿𐌸𐌸𐌴 𐌷𐌹𐍅𐌹 𐌲𐌿𐌳𐌹𐍃 𐌲𐌰𐌼𐌹𐌺𐌹𐌻𐌱𐍉𐌺𐌰𐍃𐍄𐌰𐌱𐌹𐌳𐌰𐍄𐌰 𐌽𐌹 𐍆𐌰𐌿𐍂 𐌼𐌰𐌽𐌰𐌲𐌰 𐌲𐌿𐌳𐌰 𐌱𐍂𐌿𐌺𐌾𐌰𐌳𐌰 𐌰𐌹𐌸𐌸𐌰𐌿 𐌰𐍄𐌱𐌰𐌽𐌳𐍅𐌾𐌰𐌽 𐌽𐌰𐌼𐌹𐌽𐍃 𐌸𐍂𐍉𐌸𐌹𐌻𐌴𐌹𐌺𐌹𐍃 𐌰𐌽𐍃𐌰𐌿𐍃.